Ciplun: Magu hyder yn y sector iechyd

Trwy holiaduron a sgyrsiau unigol, mae tiwtoriaid Magu Hyder o fewn byrddau iechyd yn dod i ddeall pam nad yw aelodau staff yn ddigon hyderus i ddefnyddio’r Gymraeg yn eu gwaith. Mae sesiynau mentora a chymorth un i un yn cael eu darparu, wedi’u teilwra i’w hanghenion ieithyddol. Mae cyfleoedd yn cael eu darparu hefyd i ymarfer siarad gyda chydweithwyr eraill, a chynigir cyrsiau preswyl yn rhad ac am ddim yn Nant Gwrtheyrn ar gyfer staff gwasanaethau iechyd a gofal sy’n gallu siarad ar lefel ganolradd, Uwch a Hyfedr. Erbyn hyn, mae gan bob bwrdd iechyd yng Nghymru, yn ogystal â Gofal Cymdeithasol Cymru ac Iechyd Cyhoeddus Cymru, diwtor Cymraeg Gwaith amser llawn sy’n gweithio gyda staff. Mae hyn yn cyfrannu at gyflawni cynllun Mwy na geiriau Llywodraeth Cymru, sy’n cydnabod yr angen ym maes iechyd a gofal cymdeithasol i ddarparu gwasanaethau trwy ddewis iaith siaradwyr Cymraeg ar adeg pan maent yn teimlo’n fwyaf bregus.

Mynd 'Nôl