Ciplun o arfer: Ysgol Gyfun Llandeilo Ferwallt

Y cysylltiad rhwng hunanwerthuso a dysgu proffesiynol

Mae gan yr ysgol systemau effeithiol ar gyfer rheoli perfformiad pob un o’r staff. Mae amcanion adolygu datblygiad proffesiynol yn cyd-fynd yn agos â blaenoriaethau’r ysgol a dyheadau aelodau staff unigol. Yn rhan o’r broses hon, rhoddir cyfleoedd buddiol i staff drafod eu gofynion dysgu proffesiynol.

Mae’r rhaglen dysgu proffesiynol wedi’i chynllunio’n dda i ddiwallu anghenion yr ysgol ac aelodau staff unigol, yn ogystal â chanolbwyntio’n agos ar flaenoriaethau’r ysgol. Mae hyn yn cynnwys cyfleoedd gwerthfawr i staff rannu arfer dda. Er enghraifft, mae uwch arweinwyr yn nodi arbenigedd y tîm ADY, gan gynnwys staff y cyfleuster addysgu arbenigol, ac maent yn rhannu eu gwybodaeth yn ystod cyfleoedd dysgu proffesiynol gyda staff addysgu i sicrhau bod disgyblion ag ADY yn cael eu cefnogi’n dda mewn gwersi prif ffrwd.

Mae’r ysgol yn bartner arweiniol ar gyfer addysg gychwynnol athrawon. Mae’r bartneriaeth hon yn darparu cyfleoedd buddiol i arweinwyr weithio gyda’i gilydd a datblygu dysgu proffesiynol ar gyfer pob un o’r staff.

Mynd 'Nôl